Ducati All New DesertX 街道篇 – 比Monster更舒服

上次iBike Alex試過Ducati Desert X在沙泥地的表現之後，讚不絕口。Alex認為Desert X越野性能比Multistrada高好多。畢竟Multistrada是多用途車偏向街道設定，而DesertX是多用途車偏向越野設定，所以在越野場上，DesertX的長衝程避震和越野輪胎，便可以完全發揮優勢。

今次輪到老編試下Desert X行街表現如何。DesertX有六個行車模式，只有兩個係爛路模式，其餘四個都係公路模式。公路模式分別係Sport / Touring / Urban / Wet，爛路模式係Enduro 和 Rally。在公路最強模式當然是Sport mode，110hp馬力最足，電控防護最低，油門反應最爽。所以今次試騎，都係set左係Sport mode。

老編認為，DUCATI DESERTX最吸引嘅地方係佢嘅外表，因為佢呢個Dakar風格，同埋呢隻白好似陶瓷白咁樣，再加埋車身線條和貼紙拉花有80年代復古元素，好搶眼。重有兩盞圓燈，辨識度好高。DESERTX有全新LED燈組。雙圓LED頭燈內置DRL位置燈，迫力尾燈在緊急煞車時會自動閃動提醒後方駕駛者。

DesertX座高雖然有875mm高，其實坐上去就唔係咁得人驚。因為佢車身窄，加上避震軟，一坐上去座位已經下降了很多，側架已經好似快掂到地面咁。真係唔夠腳的話，穿著越野靴或厚底鞋已經幫到手。仍然驚信唔過自己的話，原廠有低座kit可以降低座高30mm，Sorted。

一、二波的拉扯力真係幾好，不過轉波有點頓挫感。油門唔重，很容易控制。操作離合器所需的力度也不重，加速感覺都相當強烈。在市區，1、 2、 3波都非常好用。試過二波龜速跟住巴士上斜時，轉數只有2500轉，車速約是28km/h，有輕微震動感。你會知道機器並不在最舒服的狀態。但當把速度提升至3xkm/h時引擎感覺就ok了。

全新DesertX動力心臟來自新一代937cc Testastretta 11° V2機器，最高馬力110hp。全新設計的編織式鋼管車架配以長衝程避震，頭21吋尾18吋輪圈，車身乾重只有202kg，天生便是骨格精奇。引擎熱量方面，試騎當日氣溫32度，熱量主要係來自凳底吹出去大髀嘅後方，如果說是涼浸浸當然是騙你，但可以接受嘅。

DUCATI 2022 DesertX六軸電控套裝包括Traction control DTC、Wheelie Control DWC、Engine Brake EBC、快速轉波 DQS、定速巡航Cruise Control，三段式調較或可關閉的Cornering ABS。

垂直的五吋TFT彩屏、六軸電控防護、Brembo M50 monobloc單件式迫力卡鉗，都是DesertX令人心動的賣點。儀錶板資料齊，又易讀。有顯示外間空氣溫度，里程計、油耗數據、水溫、引擎轉數、燃油存量、時間，全部都齊，好清楚，佢一次俾晒你睇，唔使分開幾個page要人搵。

呢個TFT錶板重有Standard和Rally兩種顯示模式，Standard是在馬路上使用，顯示轉數、車速、波段、油量等資訊。Rally模式的顯示資訊以剩餘航距為主角，其他資訊都有，但只是配角。

Quickshift在1-3波時，轉波有少許頓挫感。所以我都係習慣用返手動轉波會好啲。三波行60-70km/h最舒服，湧下湧下，好爽。避震雖然係長衝程設定，但係都幾撐得住。在鬧市使用，市區穿梳，攝下車隙，Desert X真係好適合。轉向把手雖然闊，但車身窄，行車時操控很輕盈，再加上坐得舒服，坐姿又直。日常用車，每天用真係OK。

Alex講過DesertX比Multistrada更窄身，操控上更靈活。再加電子油門反應非常暢順，當車身在不同傾角時仍然可以作出細微的油門操制。新車的重心和整體平衡感也非常好，尤其是慢速應付不同坡道，操控仍然輕鬆。綜合整體表現，可以說是得心應手。

老編對以上內容完全認同。事緣係有架的士係小路出大路竟然冇停車，遇上老編在直路上試緊加速，意外嘅野真係咁橋，俾晒機會老編考驗DESERTX的緊急收車能力。結果係收得切車，冇撞到。

雖然嚇到標晒油，但發現DESERTX收車表現快速而穩定，頭叉又冇縮得好緊要。DesertX的前制動是Brembo M50單件4 pots卡鉗配320mm孖碟。尾碟直徑是265mm，配Brembo 2 pots卡鉗，手感柔韌，微調制動力度也很方便。正。

二波行車，引擎轉數在一千餘轉時會跑馬仔。解洋辦法係吊極力子要吊耐少少，感覺先至會柔順。始終呢架車機器都係偏向高轉發揮。當引擎在舒適狀態時，車身震動不大。行順左唔震，在怠轉時車身震動也不大。

DesertX攝車罅冇得頂呀，轉向把手雖然闊，但車身窄。車身窄嘅好處就係落腳容易，停燈口我可以選擇腳尖觸地，或者勉強腳踭掂地。新車的前後避震都係Kayaba出品。前叉是46mm倒叉，230mm行程。尾避震筒配鋁合金尾搖臂，行程有220mm。

前叉避震係淋淋地嘅，但係回彈控制得好，回彈好韌，Rebound做得幾好。座高雖有達到875mm，但離地距有250mm，足以應付任何路段。避震在慢車時感覺很軟，但現在過上凹凸不平時又會少少跳動，又唔係接受唔到，感覺好得意。

跟車輪胎是多用途兩用的Pirelli Scorpion Rally STR，屬於Tubeless無內膽設計，頭90/90-21，尾150/70 R18。起初會擔心在舖裝路面上的咬地能力會否差一點。但在實際試騎時，感覺到新車的彎向表現好穩定，21吋直徑頭轆又唔會太鈍。

DesertX真係一架好容易揸嘅車，亦都係一個好舒服嘅車。唔覺唔覺呢架車老編都差不多玩了兩小時，時間過得快說明玩得開心。DesertX不單止越野性能強，也很適合做腳車天天使用。腳踏位置好好，小釘踏再加橡膠，好啜腳，唔使擔心雙腳會走位。在鬧市應付燈位好似揸架四百街車咁樣，好輕容易。

歐五937cc水冷Testastretta 11° Desmodromic引擎在Ducati多款型號中見過，包括Monster、Multistrada V2、Panigale V2。而DesertX的引擎採用新一代設計，所有零部件都有減重，令引擎總重量輕了1.7kg。

馬力輸出是110 hp / 9,250 rpm，扭力輸出是9.38.kg-m / 6,500rpm。相比起Multistrada V2，DesertX波箱齒輪比有改動。一波和二波比率更低，方便慢速應對惡劣路面。六波比率較高，方便高速低轉跑長途。

但DESERTX係呢個風擋不能調較，高速時感到風噪偏高，對騎士的氣流保護也不算充足。高速時亂風吹入身和腳，如果重要雙騎天天由東涌出九龍的話，同一副機器，揀番Multistrada V2會較合適。咁Monster適合咩人呢？嚴重唔夠腳長的人囉：)

DESERTX車主當然會幫襯Ducati Performance配件。其中最吸引人的項目包括把騎士和乘客座椅結合在一起以提高越野活動效率的拉力鞍座，以及額外的 8 升油缸，令總容量達到29升！還有總容量達到117 升的原廠鋁製邊箱與頂箱，還有LED射燈、泊車大架、加熱把手，以及可以增加7%輸出的Termignoni靚聲死氣喉。