豪爵TR300 Plus – 好似街車咁好操控，但更舒適，現在改款更靚仔！
豪爵又有新車到港喇！新車型號叫做TR300 Plus，和TR300一樣都係走輕量化美式巡航車路線。究竟Plus版同之前我地試過嘅TR300有咩唔同呢？Plus版有咩優點？與同等級對手相比，又有咩優勢呢？Plus版又會適合邊D人買呢？
TR300 Plus引擎仍然係TR300嘅298cc直二水冷異步雙缸引擎，動力平衡係佢嘅優點，低轉有力，高轉精神。最大馬力29.24匹，最大扭力2.83公斤米。動力輸出充沛平順，相當適合城市通勤和長途騎行。豪爵呢款引擎技術相當成熟，可靠性高，維護成本相對較低。
同TR300一樣，Plus版採用各國名牌零部件，包括博世ABS、KYB避震、Nissin卡鉗等國際品牌零件，強調穩定性與耐用性。
豪爵TR300 Plus與TR300嘅主要差異只在外觀和配置細節有改動，而動力、避震及制動等硬件仍然保持不變。
Plus版將初代的鵝蛋形頭燈改為經典圓燈，規格係LED雙透鏡歐司朗光源大燈。優點係遠光照射距離更遠，近光照射路面角度更闊。尾燈從以前V型調整為U型，完全係另一種設計。
配色方面，Plus版採用黑化處理。以霧面黑及星光黑為主調，取消左電鍍裝飾。而水箱護罩、死氣喉嘅造型都較簡潔。前叉避震器增加防塵套，令整體風格更有格調。
錶板方面，第一代TR300使用DL250同款嘅長方形負顯液晶錶板，Plus版則升級為圓形彩色螢幕錶板，顯示資訊更清晰，更帶有復古味道。
至於試騎感受，其實和TR300分別不大。座高保持730mm，座椅設計符合人體工學，長時間騎乘不易疲勞。離地距有180mm，適合多種路況。避震系統調校適中，能夠有效過濾路面顛簸，提供舒適的騎乘體驗。
引擎振動抑壓得幾好，即使長途騎乘都唔會覺得有勉強。至於操控性方面，Plus版重189kg，靈活性與初代一致。但外觀調整後視覺更協調。
298cc直二水冷機器著車容易，引擎震動輕微。扭動油門反應爽朗，MIKUNI電噴表現敏銳。更值得一讚是排氣聲低頻豐厚，令人放鬆心情，呢個就係異步雙缸引擎的好處。
六速波箱表現成熟，F.C.C.滑動離合器兩指輕扣果然慳力。就算未磨合，轉波時表現也相當順暢。入波同埋搵空波都相當容易，機械阻力十分少。而且波段比例平均，一波未算長氣。最舒服嘅巡航波段係五波至六波，即使在上長斜時，以五波5000rpm行車都係輕描淡寫，無需急於轉用低波，增加噪音和震盪。
雖然TR300 Plus係美巡造型，但轉向把手似是升高左嘅街車把手，多過似係升高而向後摺曲嘅美巡轉向把手。所以新車仍然容易操控，甚至比街車有更舒適嘅駕駛環境。
如果初次接觸TR300的直二引擎的話，一定會感到驚喜，因為爬速表現相當積極，車速由靜止至100km/h表現相當活潑。
座高只有730mm，寬厚的座墊，包裹感強。壓紋設計配以啞光蒙皮，觸感柔和。除了好看之外，實際坐落去也感到相當舒適。尤其是尾龍骨可以貼住座墊後部，既可借力又有承托感。實際駕駛時也有一定防滑作用。
雖然TR300 Plus嘅離地距高達180mm，但KYB避震表現並唔係傳統美巡軟綿綿感覺，而是有一定實戰能力的街車式避震調較。尾避震行程有67mm，有承托時也保留了一點韌性。並具有七級預載調較，可根據偏好和路面狀況自由設定。
頭尾輪圈直徑都是16吋，提供清晰的路面反饋感受。與同等級對手相比，TR300 Plus係舒適性和操控性之間，找到了較好的平衡，行車時濾震表現良好，也不會死硬。頭尾輪胎時刻保持貼地能力，適合多種騎乘場景。車價唔貴，相當親民。
所以選擇TR300 Plus嘅原因好明顯，包括偏好年輕化設計：圓形頭燈、黑化車身、彩色錶板等等嘅改良。Plus版也著重實用性升級：防塵套、USB介面等細部提升日常使用便利性。係相同價格之下，Plus版配置更優良，適合首次買車或追求原廠改裝的騎士。
不過，初代TR300仍然有賣點。如果閣下預算有限，車行可能會對舊款提供優惠。又如果閣下喜歡電鍍裝飾，咁樣初代的電鍍元素，會更有經典巡航味。初代嘅外觀改裝空間也較大，更適合個人化需求。
TR300 Plus適合追求外觀時尚、配置升級且無需額外改裝的用戶，尤其係推薦俾年輕騎士，或注重品質穩定的摩旅愛好者。而第一代TR300，就適合那些對預算較敏感，或偏好經典設計的用戶，或計劃自行改裝的玩家。
無論係TR300 Plus或是TR300，都適合新手或是城市通勤者選用。因為操控容易，動力適中，油耗經濟，好適合日常係城市中通勤代步。但如果閣下係復古車愛好者，喜歡復古風格但又希望擁有現代配置的話，咁就要選擇TR300 Plus。
總結係，TR300 Plus係一款兼具性能、舒適性和性價比嘅摩托車。在同等價位中提供較高嘅配置同埋品質，適合預算有限但追求高性價比嘅騎士選用。
留意豪爵TR300 Plus分為兩個版本，標準版即係iBike試騎果架，車價係港幣四萬二千八。用信用卡，分兩年慢慢供，每個月都只係一千九百幾乍。
另一個版本係旅行版，車價係港幣四萬四千九，售價只係多兩千一蚊。但係多左好多野！包括高風擋、錶板遮光罩、護手擋、邊箱架連同一對邊箱，重有乘客靠背！打一句問一句，都係買旅行版啦！
298cc雙缸水冷四衝程
缸徑×行程57.3mm × 57.8mm
壓縮比11.5:1
最大功率 29.24ps/8500rpm
最大扭力 2.83kg-m/6500rpm
供油 電噴
六前速波箱
長×寬×高2300 × 915 × 1145mm
軸距 1520mm
濕重 199kg
最小離地距 180mm
座高 730mm
前制動 Φ290mm碟式煞車
後制動 Φ240mm碟式煞車
前胎 130/90-16 67H
尾胎 150/80-16 71H
油缸容量 16L