01 新車快訊 New Bike Express

DUCATI 2022 DesertX擁有新一代937cc Testastretta 11° V2機器，最高馬力110hp。全新設計的編織式鋼管車架配以長衝程避震，頭21吋尾18吋輪圈，車身乾重只有202kg，天生便是骨格精奇。 Ducati然後為DesertX配上垂直的五吋TFT彩屏、六軸電控防護、Brembo M50 monobloc單件式迫力卡鉗，令人食指大動。 DesertX project其實早在2019年開始啟動，經過廣泛的意見收集之後，定制出Dakarian style的主軸路線，令到DesertX揚溢著達卡風情。 車花和用色都有80年代復古元素，配合以白色為調的的騎士服飾，令人耳目一新，Ducati不再只是紅或黑，重有白色㗎！ 真正吸引到老編的地方，是DesertX可以選配副油缸以加長續航距。副油缸安裝在車尾位置，好靚。當21L主油缸唔夠油時，便可以在TFT錶板上叫喚內置電泵，把8L副油缸的電油輸送去主油缸，相當好玩。 官方宣傳片以沙漢作為主題，咁DesertX是否只能跑沙漠？香港冇沙漠喎？放心，呢D只係宣傳手法，其實DesertX應對公路係完全冇問題。因為睇番六個行車模式，只有兩個係爛路模式，其餘四個都係公路模式。 公路模式分別係Sport / Touring / Urban / Wet，爛路模式係Enduro 和 Rally。在公路最強模式當然是Sport mode，110hp馬力最足，電控防護最低，油門反應最爽。 至於Enduro和Rally的分別是駕駛難度，Rally是全馬力模式，比較適合老手。Enduro馬力被封印在75hp，電控防護介入程度較Rally mode高，更適合新手適應和發揮。 DUCATI 2022 DesertX六軸電控套裝包括Traction control DTC、Wheelie Control DWC、Engine Brake EBC、快速轉波 DQS、定速巡航Cruise Control，三段式調較或可關閉的Cornering ABS。 新車的前後避震都係Kayaba出品。前叉是46mm倒叉，230mm行程。尾避震筒配鋁合金尾搖臂，行程有220mm。座高雖有達到875mm，但離地距有250mm，足以應付任何路段。