張雪電機8公斤爆50kW！今次直情識飛啦!

電動電單車發展得愈來愈快，而最近內地車手兼研發人張雪公開展示嘅一款全新電機，更加引起唔少車迷討論。最誇張嘅地方係咩？呢台電機重量只有約 8 公斤，但峰值輸出竟然高達 50kW！如果換算成馬力，大約相當於 67 匹左右，已經達到甚至超越部分 500cc 雙缸汽油電單車嘅水平。

軸向磁通電機（Axial Flux Motor）

根據公開資料顯示，呢台電機直徑約 200mm，採用近年相當熱門嘅「軸向磁通（Axial Flux）」設計。相比傳統徑向磁通電機，軸向磁通電機嘅優勢主要係體積更細、重量更輕，但功率密度更高，更容易做到高性能輸出。

以目前公布數據計算，功率密度高達 6.25kW/kg，絕對係相當驚人嘅水平。其實對於高性能電摩嚟講，50kW並唔係最震撼。真正吸引車迷嘅，反而係「8公斤」。因為電動車最大問題一直都係重量。電池已經夠重，如果電機仲大大舊，整架車自然變得笨重，影響操控、過彎同跳台表現。

如果能夠將電機重量大幅降低，車架設計自由度就會高好多。因為會有更理想嘅前後配重、更靈活嘅操控表現、更多空間擺放電池及散熱系統，也較輕身。

在賽道上，輕量化往往比單純增加馬力更重要。唔係得大馬力咁簡單當然，紙面數據永遠只係第一步。一台高性能電機仲要考慮 持續輸出能力、 熱管理系統、 耐用性、 防塵防水能力和能否長時間高負荷運作。

高性能電機通常需要透過測功機驗證輸出、效率及散熱能力。

特別係越野環境，電機經常面對泥沙、震動、高溫同頻繁大電流輸出。如果散熱做得唔好，再大功率都可能只係短短幾十秒嘅「爆發模式」。

所以未來實際測試結果，將會係關鍵。劍指高性能玩家市場？從張雪以往產品方向睇，今次都唔係走代步路線，更似針對電動越野玩家和高性能賽道玩家等等極限運動市場。

輕量化電機可有效改善越野車操控及車身配重

簡單講，就係為追求加速、操控同刺激感而設。如果最終能夠成功量產，國產電摩可能正式進入另一個階段——唔再只係講續航力同代步，而係開始同高性能汽油電單車正面較量。近年全球不少超跑品牌同電動車廠都開始研究軸向磁通電機，包括汽車同電單車領域。

張雪團隊展示出嘅8公斤50kW數據，的確令人眼前一亮。不過最終成敗，仍然要睇量產後嘅可靠性、散熱能力同實際騎乘表現。如果真係能夠做到輕量化、高輸出同高耐用性兼備，未來電越野同高性能電摩市場，隨時會出現一位新玩家。

高功率密度電機有望推動電動電單車向更高性能方向發展