2022 PGO TIGRA 250 ABS 小伙子力氣大! 重有平地台!
新車查詢: 德勤電單車服務
Production: Jerry
今次試呢架 PGO TIGRA 250 ABS，初頭諗住呢架TIGRA 250會唔會同之前TIGRA 200嘅size差唔多呢？確實係會有少少分別嘅，由於佢係一架150cc size嘅電單車嘅體積，但係佢擁有住嘅250cc引擎嘅容積，所以就會有住嗰個嘅便利性，亦都會有嗰個嘅動力澎湃。
PGO TIGRA 250 ABS動力心臟係採用DOHC雙頂置凸輪軸設計，高轉輸出會比SOHC設計更強。但一般DOHC引擎嘅唔好處就係頭段起步，甚至乎係中段係會爭啲嘅，去到尾段嘅話就能夠可以完全發揮到DOHC引擎嘅專長。
但係到我實際揸落去，在燈位爆嘅時候又冇乜嘢喎。PGO TIGRA 250 ABS馬力真係要有畀到你嘅佢全部畀曬。好似迴旋處出要爆上去，話爆就爆，話有就有， 我又覺得唔錯，騎慣細車的人，一定會覺得佢動力澎湃強勁。即使突然間要搶位起步，或者要食位呢啲情況，TIGRA 250完全達到你心目中想要嘅位置，甚至乎佢係做得到你想要去 “你去啦~幫我爆上去” 佢係做到嘅。
至於點解會有呢個細體積而又大容積系列嘅電單車出現呢？
原來基於台灣嘅法例，電單車牌照係分為紅、黃、白三級。而每個級別嘅牌照需要獨立考試，先至可以領取該駕駛牌照。三個牌照在路權上亦有分別：白牌電單車在十字路口唔能夠直接左轉，而紅、黃牌電單車就可享有直接左轉嘅路權。
另外亦只有紅、黃牌嘅電單車可以上高速公路，因此台灣廠方就推出呢D大容積但係細體積嘅電單車，希望可以滿足一啲想享有黃牌電單車嘅路權，而又可以有著細體積電單車嘅靈活性。
到底150 cc 體積嘅 TIGRA 250 喺高速公路，會唔會俾啲風吹到扭來扭去，歪歪斜斜呢？經過我實際試騎，發現TIGRA 250在高速公路的表現好穩定。試過有架大車喺隔離，佢都仍然好定。可能我個人重啦，又或者當時風速唔算太高。
不過對於呢個細小體積綿羊嚟講，喺高速公路就唔會話係好驚，唔會話冇乜信心嘅感覺。佢都係畀到你嘅，甚至乎係我想過呢架車咁，”俾油～ 過佢～” 咁就話俾就過，係完全冇難度，始終佢擁有住250cc嘅馬力，呢一樣嘢係佢優勝的地方。
PGO TIGRA 250 ABS的風擋，純粹係外觀裝飾多過實際用途。外觀上實係好睇啲，因為可能我比較高，你會覺得啲風照舊喺心口撞埋嚟。如果係有少少雨落嘅話，咁樣身體大部份都會濕到身，若果真係要喺高速公路駕駛想舒服啲，應該要換一個高風擋會比較好。
大家都知道，大部份超過 200 CC嘅綿羊都未必有平地台，咁樣呢架 Tigra 250 就擁有一個唔算太過狹小嘅平地台，呢方面係呢架車優勝之處。
咁另外就有個單槍6連桿嘅尾避震，打橫斜斜地瞓咗右邊車身度。PGO TIGRA一向以運動化的中置尾避震提升卓越操控馳名。所以呢個設計當然唔會俾輸蝕俾雙尾避震啦。好似我過呢啲壆，呢啲天橋路壆，完全將路面顛簸嘅幅度吸收曬。坐落去係舒服，係唔錯嘅，
呢架車嘅把手，坐姿，因為我身形比較高，我都大概186cm身高，所以我隻腳會比較長，坐落去嘅時候，個把手又幾舒服，即係成個坐姿都唔錯，前面腳踏位有少少傾斜，如果係一啲標準身高人士，將隻腳擺上去斜踏位嗰度，駕駛長途嘅話，其實都有少少巡航嘅感覺，但係始終有個平地台，攞分嘅分數確實係好高嘅。
有時我揸啲大綿羊，好似啲300cc、400cc嘅綿羊，佢嘅迴旋半徑，即我哋所講嘅軚嘅轉向角度，即係我要調頭或者甚至乎係泊骨位，係可能要扭多幾手軚。呢部TIGRA 250 犀利呀，可能係因為基於佢係一個細少少似150 cc電單車綿羊嘅車身體積關係，佢嘅轉向角度好大。
若果話要掉頭嘅話，基本上如果你行駛速度唔算太快嘅話，可以一手軚就轉曬一條行車線，咁就可以180度轉向，如果泊骨位，慢慢扭入去掉頭，完全係冇難度，呢樣係開心嘅。
唔知係咪因為我自己平時查開嗰架車條呔比我用到有少少方形，我揸呢架 Tigra 250嘅時候，覺得佢嘅彎向係比較敏感，少少瞓落去，佢嘅傾斜角度就已經好低，入彎嘅敏捷度好大。
坐墊夠晒大亦坐得舒服，不過唔知係物料嘅關係定係設計嘅問題，當剎車嘅時候，基於物理原理，個人就會向前衝，包裹坐墊嘅皮就會摺埋，導致騎士傾前嘅幅度加大，好似坐墊皮同整個坐墊完全分離咁；感覺上會有少少唔舒服，但係除此之外整體上成個坐墊係柔軟同埋面積大，得分方面係高嘅。
呢部PGO TIGRA 250 ABS 喺香港我覺得真係幾適合嘅，因為價錢經濟，佢有著150 cc 綿羊嘅體積，但係又有250cc引擎嘅馬力，平地台同埋DOHC引擎，馬力係好適合喺香港駕駛。經過一段時間相處之後，我認為佢係fit嘅，係唔錯嘅。
你話間唔中跑下長途，佢冇問題。係城市穿梭，見到骨位要攝入去都冇問題。擺下野，間唔中可能有個喼要放一放，佢平地台又幫到你。買外賣放上去就可以返到屋企嘞，咁所以 PGO TIGRA 250 佢會係幾適合香港地使用。
而家有啲新款嘅電單車基於環保嘅因素，有我哋普遍所講嘅引擎怠速啟停系統，當架車停定左嘅時候引擎就會停轉，從而減低廢氣排放，甚至乎可以做到適量嘅慳油，而Tigra250都有呢個名為”stop & go”嘅引擎怠速啟停系統，正常來講某啲品牌嘅引擎怠速啟停系統，架車停定而引擎就停止運轉，如果你要起步嘅話，只要輕輕扭動油門，引擎就會喚醒，架車就會向前行駛。
呢架Tigra 250 就會多一個安全措施，如果想要喚醒引擎嘅話，你就需要扣住牛角再扭動油門，引擎先會喚醒，呢個嘅好處係多一重保障，已慎防騎士未準備開車嘅時候，意外扭動油門。
另外就係呢套”stop & go”系統嘅開關掣，通常都會設置喺把手制盒上面，方便騎士隨時作出開關，例如迴旋處準備要出嘅話，若果”stop and go”系統着咗，突然間要把握時機起步，咁樣就會延遲咗出路口嘅機會，所以喺呢個情況下有時候騎士會將呢套系統關掉，而呢架Tigra 250嘅” stop & go “系統嘅開關掣設置在錶板上，若果要隨時關掉系統嘅話，就未必咁就手，需要時間習慣。
2022 PGO Tigra 250 ABS
規格表
引擎 四衝水冷雙凸輪軸DOHC單缸4活瓣
馬力：25.5ps/ 8,000rpm
扭力：24.5Nm / 6,750rpm
排氣量 251.3cc
車架形式 高剛性鋼管車架
傳動系統 CVT無段變速系統，乾式離合器
燃油供應 電子燃油噴注系統
前懸掛 33mm 正立前叉
後懸掛 單槍側置水平六連桿懸吊系統
輪胎(前) 120/70 -13
輪胎(後) 140/70 -13
前制動 267mm碟煞配4活塞輻射固定式卡鉗
後制動 245mm碟煞配雙活塞固定卡鉗
BOSCH ABS 10 防鎖死煞車系統保護
長x闊x高 2000x745x1280mm
最低離地距 370mm
座高 785mm
乾重 159kg
