YAMAHA 精裝級小羊選擇： Force 2.0 & Augur 155 – 配套不同，車價相差兩千元，點揀？

新車查詢：萬里達車行

Production: Cindy Gavi / Dave

YAMAHA ALL NEW FORCE 2.0和Augur 155推出的年份分別是2022和2023年。兩車平台相若，都是採用BLUECORE VVA 155c.c.水冷4V單缸引擎作為動力心臟。最大馬力14.7ps/8000rpm，最大扭力1.14kg-m/6500rpm。Force 2.0使用傳統平實的配套，而Augur則以星芒狀的頭燈標誌設計，配套更先進。兩車售價相差HK$2,000元，應該點揀？

論裝備，Force 2.0已擁有騎士所需的重要元素：VVA 可變氣門驅動Blue Core引擎，有Traction Control，座下可收納XL大頭佛，重有超大平地臺。而Augur 155更有全車LED燈組，keyless，TFT彩屏，和Y-LLA (Yamaha Lean Light Assist，轉向輔助頭燈)及 Y-AU (Yamaha Adjustable Color Temperature Unit，可變色溫頭燈) 兩大機能，都是世界首度發表並成功應用的最新科技。

論駕駛感受和日常用車，兩車沒有分別。商用的話，更應考慮日後維修成本。正所謂low tech撈野，high tech揩野。貴價零部件日後要維修的費用自然會貴一點，現在車價又貴一點。如果是車隊入手的話，絕對應該揀Force 2.0。至於私人買車的話，如果是用家也應該揀Force 2.0。只有玩家才應該選擇Augur 155。因為只差兩千元，便擁有keyless和TFT彩屏，還有一個科幻感極重的車頭，值回票價呀。

以下時間，交俾香港資深女騎士Cindy Gavi，和大家分享一下她對Augur 155和Force 2.0的模擬用家體驗和駕駛感受：

Hello大家好呀, 我係Cindy Gavi。我係一個鍾意電單車嘅中女，揸咗電單車都有差唔多9年時間。今日有幸試騎兩架內在和結構都係一樣Yamaha新羊仔，分別係Augur 155和Force 2.0。經過兩個多小時的接觸，這兩款車俾我的感覺係好輕巧，同埋儲物空間都幾大。Full Face頭盔都可以擺得落，座墊開啟的幅度非常之大。座墊還可以向前推，所以絕不會阻礙我存取物件。

如果放電腦laptop的話，唔好超過15吋都ok。佢個空間都真係相對地深呀，iPad Pro都可以放得落。連我呢個頭頂有蝴蝶結的個人招牌頭盔都可以輕鬆收納，其他雜物可以就咁掉曬落去，跟住一野拍落去閂座位便走人去返工，讚！

我地女仔返Office嘅經常都會著裙，又或者要坐得斯文啲。即使我呢啲鍾意著短裙揸車嘅人，穿高踭鞋揸車嘅，都完全不用擔心走光的問題。

我哋重要擺個大手袋，除了返工之外，還有日常生活要去買嘢飲呀，買嘢食，甚至乎係買餸，Augur 155和Force 2.0都可以幫到手，所以呢兩架車真係幾實用。

佢地仲有個好處就係有一個真正大平地臺，攝影師果個裝滿器材嘅大袋，都係就咁放在地臺上行車。所以呢兩款車雖然係細車，但都唔一定需要裝尾箱。

Augur 155和Force 2.0另一個好處是Seat位唔會太矮。坐上去之後，對腳唔會屈住屈住。比起以前Yamaha SMax的低座位，雙腳明顯摺埋左。而Augur/Force的座位稍高，可以令人坐得更舒服。

細羊的車身當然輕巧，操控又好輕手。值得一讚係加速表現都ok，一俾大油即有反應。0-80km/h表現合理，Augur/Force好適合市區使用。試車當日氣溫都有32度，但整體駕駛感都好輕鬆。駕駛姿勢開揚，人唔會俾機器所產生的熱風吹住，只有行車時的生風幫手降溫，相當寫意。

如果和我的Vespa GTS 300綿羊相比，GTS 300的輸出當然會比155強勁。但論車身重量和容易操控這環節，Augur/Force 155便勝過我的GTS300。無論是推車或泊車，轉彎或調頭或倒後，Augur 155和Force 2.0好容易平衡，也很靈活。不用擔心車身太重令人難以控制。落大架果下直頭輕到有少少嚇親呀，勁輕呀~~

以身高160cm計算，即使不穿高踭鞋，不用特別坐到好前，前腳掌也可完全掂地。要靜態推車或四腳爬爬嘅，都仍然很輕鬆唔使點用力。不需要把屁股移到好前和車身搏鬥，非常之易控制。所以女仔揸Augur 155和Force 2.0應該都幾輕鬆嘅。

小妹揀車其實好注重外型，絕對係外貌協會的會員。呢兩架嚟講呢我就覺得佢哋係比較傾向型格路線，而唔係走可愛路線。呢兩款車的外型我都鍾意。Force 2.0我相信和之前的Force一樣，都係一款耐看的長青樹。

Augur和Force兩架車揸落比較的話，老實講我覺得佢哋兩架車揸落嘅感覺分別唔大。呢兩架真係我都係差唔多孖生但係只外型有少少分別。