我在中環揸電車!BMW CE 04 扭力猛加速快,過彎又夠定!

我在中環揸電車!BMW CE 04 扭力猛加速快,過彎又夠定!

Production: 班長 / Dave
新車查詢:BMW Concessionaires (HK) Ltd

寶馬全新電羊CE04,之前iBike都介紹過幾次,所以我地直入戲肉,講下駕駛感受。先講令人擔心的地方:CE04車長高達2285mm,軸距長達1675mm,車重達到232kg。在帳面上看,CE04比起寶馬的歷奇王牌R1250GS,無論是車身和軸距都更長。重量也只是相差17公斤。

不過CE04有秘密武器,就係Reverse Gear後波。坐在車上雙腳到晒地,長按R鍵再扭動電門,車身便會緩慢地向後退,車速不會太快,好易控制,所以泊車其實唔使擔心,亦都唔使落車推。

CE04採用水泠式永磁同步電機(PMSM),雖然電機最高轉數係12,300rpm,但係42hp最高馬力在4900rpm便出現。最高扭力62Nm更只在1500rpm便出現

電動車最重就係電池,所以採用內燃機車款改裝的電車,車架設計未能把電池放到最低,造成高重心的壞處。CE04係全新開發項目,唔係用現成車架,所以寶馬可以將電池放在車架最低處。實際駕駛時,會感到車身重心比Boxer引擎更低。不但只行車表現輕盈,過彎時穩定感也相當高。

其實起初開車時時,最唔習慣係轉向把手好輕,感覺和車身分開,感覺有D鬆,好想幫佢裝釘把。但係車速提升之後,長軸距發揮作用,把手變重,感覺變番實淨。扭蛇仔左右擰時,都係用腰部發力為主,表現比想像中更活潑,而且都幾好玩。另一樣好玩係CE04巨型TFT彩芒,當進入導航模式時,地圖可以縮小和放大,唔係淨係時一個轉向指示,感覺好人性化。當唔識路時,呢個立體地圖顯示便相當有用。

雖然CE04馬力只有42hp,但電動車的Instant torque效應,在車身唔算輕的CE04身上仍然相當明顯。 試車時只係road mode, 都未用到dynamic,一扭電門已經即刻標,好似玩緊巨型電動滑板車咁。

如果你習慣左自動波綿羊嘅CVT波箱的話,上到CE04就會感覺到動力傳遞係天與地、日與夜的分別。CVT波箱瓜瓜嘈一陣先行,永磁同步變頻電機唔出聲即刻推你走。

講到咁勁,咁慢車咪好難控制?咁又唔使擔心,當只是扭動1/4電門時,車速只是溫柔地爬行,慢車控制好容易。但當扭動超過1/4時,62Nm的扭力逐漸介入,加速力開始爆發。

當你感受到拉扯感開始出現時,會更加唔捨得放開電門。扭開超過一半幅度之後,駕駛者會出現一種令人狂妄急燥的快感。你會覺得馬路上好多慢車阻住你,好心你地讓一讓。不過請大家放心,駕駛CE04唔會變為另一個Teslun,因為我地玩開摩托車,平時都係習慣左快,有一定技術和預判力。

駕駛CE04係一件非常好玩嘅事,除左即扭即標的快感之外,重有動力回收的享受。一收電門,車速馬上變慢,錶板上顯示電池正在充電,呢種感覺真係好治癒。

因為迫力皮、迫力碟都唔需要咁重負擔,同時叉埋電,一收即慢行車又安全,每次收車都好似有錢落袋咁~~ 當轉騎番內燃機車款時,每一次落迫力,又有迫力粉又傷碟,感覺都係燒緊錢:(

廠方公佈CE04由0-50km/h嘅加速數字係2.6秒,極速係120km/h。玩開寶馬私家車嘅人都知道,寶馬一向對呢D有關性能嘅數字都非常保守,成日報細數。

今次CE04都唔例外,根據海外媒體GPS實測數據,CE04由零至50km/h只需2.2秒,比廠方嘅數據快左0.4秒。零至60km/h係2.7秒,最常用嘅表現係零至80km/h,只需4.3秒。至於零至100km/h時間係6.9秒,比起廠方公佈的9.1秒,足足快左2.2秒!嘩嚴重違返商品說明喎:)

講返轉頭,雖然零至100km/h時間係6.9秒,以摩托車標準唔算出色,但在路面上玩中段加速,已經快過好多採用內燃機的中高階私家車。

CE04嘅實測極速係123km/h,比廠方數據多左3km/h。廠方講明呢架係城市代步車,所以極速唔係佢主場。再加上電車如果長期擰盡電門的話,用電量會好似倒水咁,一定捱唔到廠方聲稱的130公里續航距離。

香港咁細,130km續航距足夠每日正常用車

電動車當然最關心係電量。CE04的鋰離子電池的容量係8.9kWh,即係8.9度電。咁即係幾多呀?打個比喻,以一台1500W電暖爐為例,開到最熱的話,CE04電池只能俾佢用5.93小時,在雪地上一晚都捱唔到,唔算多。

吓,咁咪好得人驚?咁又唔係喎。因為電暖爐的效率其實好低,好浪費電力。而CE04採用水泠式永磁同步電機(PMSM),雖然電機最高轉數係12,300rpm,但係42hp最高馬力在4900rpm便出現。最高扭力62Nm更只在1500rpm便出現。

乜野係PMSM呀?即係指轉子用永久磁鐵代替繞線的同步摩打。永磁同步電機的優點是體積小,起動力矩大、噪音小、溫升低。再加上節能又減少銅耗,效率更高。

從電機本體來對比,永磁同步變頻電機與異步電機的可靠性相當,但由於永磁同步電機結構的靈活性,有低速大扭矩的表現,可以直接驅動負載,省去波箱。

試車時只係road mode, 都未用到dynamic,一扭電門已經即刻標

留意永磁同步變頻電機分為表面式永磁和內藏式永磁兩種。表面式永磁(SPM)摩打的永久磁鐵在轉子的外側,結構較簡單,性能不及內藏式永磁(IPM)摩打穩定。

因為IPM的永久磁鐵在轉子的內側,結構更精密,電磁轉矩較平順。但考慮到售價和重量,電動摩托車採用表面式永磁(SPM)摩打夠做㗎喇。

講番CE04的情況,最慳電係塞緊車,因為唔使俾冷氣,只係燈組同埋電腦用緊電。在紅隧繁忙時間塞車過海,CE04又靜又涼快,唔會有引擎的噪音和熱量。再加上CE04座位低,車身窄,攝車非常容易。

用緊電車,又經常要同斜路打交道的車主便會明白,用電車的話便可以享受到無痛塞車的樂趣。CE04都係一樣,上斜時塞車唔使吊極力子,唔會手軟或怕傷極力子。冇引擎唔會熱,或者怕水滾,落山時動力回收又可以充電。電車好處非常多,只要客觀環境配合的話,只要玩過電動車,便應該返唔到轉頭。

地圖可以縮小和放大,唔係淨係時一個轉向指示,感覺好人性化。當唔識路時,呢個立體地圖顯示便相當有用。

係時候講下缺點。CE04的電機和皮帶聲音,比想像中大,唔係真係寧靜無聲。好處係可以提醒一下行人,唔好處係呢D聲唔夠排氣喉聲咁好聽。另外一樣係迷你風擋,完全唔覺有幫手擋到風。

同以前寶馬600綿羊一樣,落側架便等同拉手掣,會自動鎖尾轆。呢個設計相當聰明和方便。不過側架好貼車身,又冇一個明顯突出來的位置俾人踩出來,需要時間習慣。

總結:CE04係一部中貴價的大玩具,但仍然有一定實用性。座下可以收納一個full size頭盔,重有配件可以裝邊袋同埋尾箱。尾箱容量可以由25升擴充至35升。

可以使用家用13A三腳蘇去充電,中速充電制式係香港流行的CCS制式。即使屋企冇中差,去停車場都好容易搵到充電的地方。

家用充電由0%充至80%時間約為三個半鐘。如果充滿至100%,需時約四小時二十分鐘。快速充電只需65 分鐘就能電池由 0% 充滿至 80%,完全充滿亦只需 100 分鐘!

如果閣下的日常軌跡係以市區和上落山為主的話,CE04會相當適合。但如果係超級跨區連接,長時間盡雞扭電門跑highway的話,電量會跌得好快,最好在目的地有得補電咁就會冇里程焦慮。