Kawasaki Ninja 500 – 156cm P女 Jessica 的深度自白
大家好，我係Jessica。之前由學牌開始揸Yamaha街車MT-03，因為自己都想玩Fairing跑車款，覺得比較型呀。所以見到Ninja 500推出時，我覺得幾靚仔喎，便即刻落訂買車，現在拿了車剛好滿一個月。
還記得對上一次返回Kawasaki代理泰力做第一次service時，剛好下大雨，我在昂船洲大橋時完全感受到什麼是橫風橫雨。不過其實又冇咩咁大件事。我覺得揸電單車其實係膽大心細嘅。落雨基本上都係比較小心和比較穩陣就OK。
多謝Ninja 500的離合器是滑動式設計，令我好順手操作離合器。當在塞車時或者下雨時，如果突然間要落brake或者換檔減速，離合器不會太難去拿捏。
我身高其實只有156cm，好多香港女仔都係差不多這個高度。咁我156cm身高雙腳能否同時著地呢？當然可以啦。當我扶直架車之後呢，其實前腳掌都可以同時觸地。但其實單腳落地更穩陣，例如我右腳踩喺Brake腳踏時，左腳便可以觸地更多。
相比起Ninja 500，由我學車時代一直擁有至今的Yamaha MT-03，我會覺得MT-03比較重。可能係我學車時，為MT-03加咗了金屬防護欄的關係，所以覺得重。
現在轉騎Ninja 500便覺得佢好輕，又好容易起扶車。無論是雙腳落地，甚至是單腳落地，都好容易hold住部車。在推車或泊位時，比較輕身的關係，所以我現在駕駛Ninja 500時，我覺得更加輕鬆。
點解要揸電單車呢？我細個嗰陣其實係十分恐懼電單車。因為發生意外嘅新聞都好多，重點係電單車的傷亡比較慘重。所以我一開始覺得為電單車皮包鐵，學四個轆好過啦係咪先？
直至我身邊的朋友們佢地學咗電單車後，我開始見到佢地揸電單車的情況，都係正常駕駛，其實都唔係好危險。只要自己係做好防禦式駕駛便OK。
當我開始駕駛電單車之後呢，我便利用電單車作為通勤工具。由於我住屯門，要出市區返工。除咗打風落雨之外，我每日返工放工都會騎電單車，咁就唔使捱公共運輸。尤其係屯門公路大塞車時，唔攝車的話塞在公路上隨時一兩個小時都返唔到屋企。
電單車對於我還有一個重要功能：如果工作上面有任何煩惱呀，或者自己生活上有咩問題呢，都一律出車解決問題！就算自己一個或者同朋友都好，跳上電單車出去兜下圈吹下風，行下青山公路呀，或者去浩和街吹下海風呢，都已經可以減輕心內不少煩惱。
起初打算等一兩個月後玩熟Ninja 500先用佢返工放工，例如行下燈位比較多行下的青山公路或者係放假時候出下車先，練熟一下，摸索下佢啦。點知我揸咗兩日之後就同佢熟晒。
雖然Ninja 500的坐姿同街車好唔同，稍為前伏少少。但係因為佢有滑動式離合器，令到新手操作離合器真係十分容易。到現在為止，我都未試過因為彈極力子而死火。
Ninja 500的座高雖有785 mm，比MT-03高了5mm左右。但Ninja座位比較窄身, 所以呢我落腳時感覺上更有信心。所以我揸咗兩三日之後，便每日都揸住佢返工放工，在屯門公路上攝車已經好習慣了。反而現在重返MT-03時，便覺得自己好似好站直了身來駕駛。
在大雨中塞車時，我不停地在2、3、4波之間keep住轉換。在4波車速只有2xkm/h，但佢都唔會好震，不會chok下chok下。在雨中塞車時都不會覺得辛苦。我認為Ninja 500真係一架很適合新手和女騎的Friendly Fairing選擇。
唯一缺點係，當攝車時，架車太靜。喉聲真係細到似150細車。即係你喺側邊行過，人哋啲車可能會睇你唔到嘅時候咁就好危險，所以我覺得改喉呢樣嘢都係無可避免。
更多圖片
Kawasaki Ninja 500 (400)規格表
四衝水冷DOHC八活瓣並列雙汽缸
缸徑 x 衝程 70.0 mm x 58.6mm (51.8mm)
壓縮比 11.3:1 (11.5:1)
排氣量 451cc (399 cc)
最高馬力 45.4 PS / 9,000 rpm (45ps/10,000rpm)
最大扭力 4.3kg-m/6000rpm (3.9kg-m/8,000rpm)
車架形式 編織式高拉力鋼管車架
傳動系統 濕式多片鏈傳動六前速
燃油供應 Ø32mm雙節流閥，電子燃油噴注系統
前懸掛 Ø41mm套管油壓前叉，120mm行程
後懸掛 Bottom-link Uni-Trak單筒避震 預載調較130mm行程
輪胎(前) 110/70 – 17
輪胎(後) 150/60 – 17
前掣動 310mm單浮碟煞配兩活塞卡鉗(ABS)
後掣動 220mm單碟煞配單活塞卡鉗(ABS)
長闊高 1995 x 730 x 1120 mm (1990 x 710 x 1,120mm)
最低離地距 145mm (140mm)
軸距 1375mm (1370mm)
座高 785mm
裝備重量 171kg (168kg)
油缸容量 14公升
