KTM 舊款一樣咁精彩！詳解2018年1290 Super Duke R

當拳王遇上街霸會點樣？2018 KTM 1290 Super Duke R仍然精彩！

June 8, 2022 1290 super duke, ktm Loretta

Production: Monkey / Jerry / Loretta
新車查詢 : KTM HK

要數KTM Super Duke的發展史，第一代是2004年正式上架的<<990 Super Duke>>，然後在2014年廠方推出全新第二代1290 Super Duke R。然後在2017年，KTM再次為1290SDR推出2.5改款版，車架、電控設備都有改良。外型更換上全新頭燈造型，頭尾燈組都是LED規格。還有多功能TFT屏幕，外型煥然一新。

在2020年，KTM再為1290 SDR引入更多更新。引擎、車架、避震、外形、菜單頁面操作全部都有改。但係75度夾角V2機器排氣量維持在1301cc，輸出都冇變，仍是180hp馬力和14.38kg-m扭力。<<2020年的1290 SDR細節解說按此觀看>>

輪到現在2022年，1290 SDR再細分為標準版及配備第二代WP APEX電子避震的EVO版。新避震有三種模式，分別係COMFORT、STREET和SPORT。尾避震的預載強度可以在TFT菜單中進行10段調較，由0% -100%，每次可作10%調較，即每次2mm，共有20mm高度差別。<<2022年的1290 SDR EVO細節解說按此觀看>>

講番今次這臺2017年1290 SDR。單看帳面輸出數值是174匹和141Nm扭力，同而家好多公升級街跑車相若。但KTM的特性就是扭力比一般的直四引擎嚟得快同早D。

KTM口號Ready to Race的意思是在街道上隨時可以享受到賽車的樂趣，所以1290 SDR設定不是只在高轉尾段發出，而是好早就令到你感受到加速力，令到你在街道都可以享受這個 Ready to Race的享受和感覺。

Monkey 綽號 <真。怪物 Real Monster> 是金腰帶拳王

Monkey 綽號 <真。怪物 Real Monster> 是金腰帶拳王，現職私人健身教練。鐘情於大馬力高性能重型街車、Supermoto 越野電單車和跑車，棟頭磨包乜都玩過哂，經驗十分豐富，聽下拳王如何評價呢部 KTM 1290 Super Duke R：

它的好處對我來講可以比我盡情去玩之前所需要路段，高的把手，我依家都直接嘗試下模擬在市區到慢車坐直的時候，這部KTM 1290 Super Duke R 比到我一個好舒適的座姿。

其實我已經第二次揸呢部Super Duke R，之前朋友有一部第一代我都試騎過，記得兩者的感覺好相似，它比到我的感覺是一個純種的大馬力街車與高性能偏跑的街車中間，例如我而家不是好進取的速度去行車時，其實它比我的感覺都係好舒服，即是唔會好炆憎催你行咁樣，咁我而家都感覺好好，因為可以坐得好直。

這部車有三個mode， rain mode就唔試， so far 好似我哋揀這部高性能街車，基本上都不會諗住落雨揸嚟代步，都是遊車河玩樂。 Street mode同埋 Sport mode 開始時設定 street mode，馬力完全冇問題，快車慢車他都滿足到你，我設定sport mode之後呢，其實可以話更加好，因為他比到我的感覺不是忟憎催你行嗰隻，是你直接感覺到慢車都好。

力度都是嚟得更加豐厚，呢個感覺是幾過癮，座姿的寬容性都好大，無論我而家是鍾意趴喺度揸，進取的姿勢準備去落弩，或者市區遊走時坐到直一直，高度尚算適中，不會扯我落去夾硬要我坐直個人，都是可以好舒服的。

坐姿方面部車比較纖瘦，因為是使用V2引擎，可以仔細去睇車身外觀冇乜機器係凸出車架以外，你會發覺部車其實好窄身的，雖然有著170匹馬力，其實他的坐姿，下身的腳位不算特別高同特別屈，就像是一部普通街車的坐姿。

所有KTM Duke的特點就是下身的坐姿就像一部正常的街車，坐實個座位便可以。大脾不需要特別搬出來，上身稍為傾前，手踭打開咁揸，這樣就是一個最位合適揸KTM Duke的揸法。

2018款1290 SDR。1301cc V2機器馬力高達177hp。車架經過改良，提升操控極限。配上更低的轉向把手，還有Brembo M50單件卡鉗、Bosch MSC車身穩定系統、Cornering ABS和WP避震，車主更可選購雙向快速轉波器，令這位KTM野獸，徹底地提升至2.0的境界。

至於避震方面，因為我剛剛坐上去，完全冇做過任何設定俾佢，咁so far我而家咁樣行呢，佢嘅吸震能力都係好好，完全係冇跳，冇撞呀，好OK，仲有一樣嘢就係佢車身體積，因為一嚟到我睇到這部車的座位，車身是收到好窄，騎上去之後，其實講真，他不是大車的感覺，佢似係一部中量級的車身，就像600cc與800cc的車身，因為之前這個級別街車我都揸過，其實最大分別，是騎上架大車就覺得大部好多。

本身我身高不算高大，169cm高，70公斤都唔夠，算是輕磅，這部車雖然總排氣量是1301cc，但他比到我騎乘的感覺，是好輕鬆冇壓力，還有一樣幾緊要的一環，就是彎向方面，其實都幾主要，由於車架做得好纖幼的關係，咁我騎上去完全冇車闊的壓力，同揸一架車仔的分別不大，變相彎向的靈活度真的好高，早入彎的時間，不需要去做一些特別大的動作挨部車落去，其實你入啱條線帶住佢去個位，咁就好smooth入咗去。

新車的引擎燃燒室採用類似690 Duke具旋渦式功能的設計，令油氣進入燃燒室時，油氣混合得更好，提升燃燒效益。結果是新車較慳油，也較順滑。引擎曲軸的硬度也有提升，作用是更耐用和減少運作時的震動。生氣閥改以鈦合金製造，壓縮比也有增加，配合進氣岐管縮短了10mm，令新車的引擎紅區延後了500rpm。

還有一樣對我來講都幾驚喜，我都揸咗一段時間，真係一啲都唔熱，完全感受不到任何熱氣蒸上身上，對於這部車我的感覺評分都相當之高，對我來講，其實我直情可以攞到這部車感覺是，作為代步都可以，一來冇車重的壓力，因為架車俾我的感覺真係好輕盈，又冇熱力唔會因為熱到想死唔想揸。

馬力嚟講，真是要注意，要小心啲咩呢?! 要小心你個電單車牌照，因為當你不小心比大少少油時，佢度力出得真係好直接，嚟得好快，之但係佢快之餘，又唔似得話一定要忟憎嗰隻，是很暢順的，當然，這是取決於你比油時角度有幾大，我對這部 KTM 1290 Super Duke R 真係相當滿意，好舒服，你要佢粗暴的時候，佢都可以好暴力。

。

KTM 1290 SUPER DUKE R 有ride mode調較: Rain/Street/Sport，Optional 可以加埋個Race mode，Race mode還可以市調較油門反應，令到你可以再粗獷駕駛，同埋有個MSR尾輪打滑控制，可以控制尾輪打滑的程度，另一個基本有Traction Control 和ABS，KTM比較獨特，全線系統都可以調較ABS，最主要一般road mode，前後ABS，同埋有個Super Motor mode，咁就可以off 個尾輪，如想貪玩可以做一個尾輪鎖死的動作。

KTM其實就好少好似坊間其他牌子咁有好多個版本，總括簡單嚟講叫Super Duke R 其實都是得一個款，最多是個車身顏色唔同這樣去到R，其實已經是KTM最頂級的版本。迫力總泵鮑魚全部都採用最top的Brembo　　Ｍ50單件徑向式對四卡鉗，避震比較特別用返半自家合作關係的WP避震，咁每一個level裏面。譬如390 790 同 890 Duke都會有相應的一個系列WP避震俾返佢，當然Super Duke 的話就用緊最高級的APEX。

講完引擎，便輪到新車的防護系統。Cornering ABS有進一步優化！新車有一套名為”傾斜度感應循跡系統Lean-Angle-Sensitive Traction Control System，幫手運算Cornering ABS 。此外，車主也可額外選購一套名為Motor Slip Regulation System，負責車身進入彎道初期的循跡防護。

KTM裏面我覺得佢在設計上面既貼心和實用的，首先你看見掣盒，有些人會覺得好膠，但其實你見到每個掣的掣扭同埋個size都好明確同埋好大粒，其實是方便你帶住手套都好容易同埋好清晰撳到落去，舒適上其實佢有考慮過，坐姿不會令到你的腳位特別辛苦，令到你揸長途車都不會太辛苦。

另一個設計就是前後座位睇落好像冇乜特別嘢，但係好明顯做到兩級，同埋有個斜位，當你在巡航之下，只要放鬆個人，將個坐姿靠後少少，有足夠支撐俾你去高速巡航時令到你慳力好多，呢個都是揸KTM的心得。

原來新車的避震也經過重新調較，WP 48mm倒叉的彈簧更硬、尾避震的油壓閥門也有修改。轉向把手也分別闊了20mm、低了5mm和向前移了18.5mm。從帳面上看，新車的駕駛姿勢更低伏更前傾更進取。但實際幅度相當輕微，向前伏的程度仍然停留在街車的範圍之內。動力模式有Sport/Street/Rain三個mode，額外付費可獲Track mode。Track mode有起步彈射控制、防Wheelie起頭控制、油門反應控制，和最重要，分為九段，可選擇輪胎打滑空轉程度的MTC Spin Adjuster。

Keyless和定速巡航都是2017 KTM 1290 Super Duke的標配，不過如果你想要免扣極力子牛角、上下雙向皆可操作的快速轉波器，便要選購KTM的Performance Pack了。有了這個選配之後，智能電話也可以利用藍芽連接在新車的TFT錶板上。新車除了採用無匙keyless著車之外，更有電子鎖軚！操作方法是先左方扭盡軚，之後一按鎖軚掣盒，便可鎖車。