PIAGGIO MP3 300 SPORT 2023版加入磨砂銀，舒適好用，最緊要安全！
MP3 300 Sport版的避震彈簧係紅色。頭迫力碟是波浪碟，乘客尾扶手是啞黑色。Sport版地台有金屬踏板。LED巡航燈令成架車觀感Cyber得黎又實用，外形更美觀。
MP3 300 Sport的車身明顯比500短陣，車長由2225mm減至2040mm，軸距由1540mm減至1440mm。車闊維持不變，成架車細一個碼，係市區行車更為靈活方便。
Piaggio的300 HPE(High Performance Engine) 水冷四衝單缸引擎符合歐盟五期廢氣排放標準。新車有燃油高壓注射器，提高燃燒效益，直接的風箱設計亦令引擎底轉扭力更精神。在排氣量不變的前提下加強輸出，可見廠方係新一代引擎設計下左一番苦工。
最新調教High Performance Engine馬力增幅 24%至26.2 HP 扭力亦提升 15%至26 Nm
ASR 循跡系統 及 ABS 剎車防鎖死系統 已成為MP3 300 的標準配備。ASR循跡系統在行車時自動偵測前後輪動態，一但打滑電腦即時介入控制後輪輸出。MP3最值錢的地方是安全，就算天雨路滑都無有怕。再加上前後聯動二腳踏制制動，以及頭避震95mm行程，尾避震行程122mm，極適合香港路面使用。
重溫以往試騎感受：
MP3 300 Sport是以電單車出牌，可以泊車入骨位，司機乘客也要佩戴頭盔。300的座位高度唔算矮，正常體形當然冇問題，但如果係女騎士的話，就會覺有D壓力。腳短的人，雖然落腳時要靠腳尖，但如果玩熟左鎖頭擔的時機之後，基本上係唔使落腳的。
臨停車時鎖上頭擔，車身被鎖定不會再傾斜，雙腳可以安放在地臺上。只要一俾油便會馬上解鎖，雙腳由始至終都在地台上，便可揚長而去。 地台上的腳部空間非常充足，即使係長腿叔叔，膝頭哥都唔會頂住車頭。相比起其他三輪對手，MP3的駕駛空間明顯地較為充裕。不過座墊偏硬，冇以前行政版咁舒服。相比起MP3 500，大佬的坐墊更長更闊更軟，乘客位更有靠背，絕對是巡航級的享受。
